Дулат Тастекей: Неге салықты төмендету маңызды?
Құрметті оқырман, еліміздегі шағын және орта бизнестің дамуы – экономиканың тұрақтылығы мен қоғам әл-ауқатының негізгі кепілі. Осы орайда депутат Д.Т. Тастекей шағын кәсіп иелерін қолдауға бағытталған маңызды бастама жайлы пікір білдірді.
Депутаттың айтуынша, салық мөлшерлемесін төмендету – соңғы жылдары күшейген қаржылық қысымды жеңілдетудің ең тиімді жолдарының бірі. Бұл шара кәсіпкерлердің тынысын кеңейтіп қана қоймай, қаланың жалпы экономикалық тұрақтылығына да оң ықпал етеді.
«Егер біз бүгін кәсіпкерлерді қолдай білсек, ертең бұл біздің өңірдің экономикалық иммунитетін нығайтады», – дейді депутат.
Мәселенің талқылануына «Ақ жол» партиясы белсенді атсалысып, бизнес өкілдерімен бірге ұсыныстар әзірледі, тәжірибе бөлісті, нақты дәлелдер келтірді. Ең маңыздысы – кәсіпкерлердің үні естілді. Мемлекет пен бизнестің ашық диалогы нәтижесінде теңгерімді, жан-жақты ойластырылған шешім қабылданып отыр.
Партия 3%-дық мөлшерлемеге төмендетуді – бизнесті көлеңкеден шығару, оның тұрақтылығын арттыру және экономикалық қауіптердің алдын алу үшін жасалған маңызды қадам деп бағалайды. Бұл – кәсіпкерлерді заңды алаңда жұмыс істеуге ынталандыратын, сондай-ақ нарықтағы тұрақтылықты сақтауға бағытталған дұрыс шешім.
Осыған сәйкес «Ақ жол» партиясы бұл бастаманы толық қолдайтынын жеткізді. Бұл қадам шағын және орта бизнеске жанашыр көзқарастың, әрі экономикалық саясаттың тиімді үйлесімінің көрінісі болмақ.
- Еліміздің кәсіпкерлік саласын қолдауға бағытталған мұндай бастамалар алдағы уақытта да жалғаса береді деген сенім бар.
