Қазақтың ұлы кемеңгері — Абай Құнанбайұлына 180 жыл

2025 жылы ұлы ойшыл, ақын, ағартушы, қазақ руханиятының шамшырағы – Абай Құнанбайұлының туғанына 180 жыл толып отыр. Бұл – қазақ халқы үшін ғана емес, күллі түркі әлемі мен адамзат баласы үшін маңызды тарихи кезең. Абай – уақыт пен кеңістікке бағынбайтын, идеясы мен шығармашылығы бүгінгі күнмен де үндесетін мәңгілік тұлға. Абай Құнанбайұлы — халқымыздың рухани көсемі, ұлттық сананың оянуына зор үлес қосқан кемеңгер. Ол ХІХ ғасырда өмір сүрсе де, ХХІ ғасырдың сұранысына жауап беретін терең ой, ұлағатты сөз қалдырды. Оның әрбір қарасөзі – өмір мектебі, әрбір өлеңі – рухани бағдар. Абайдың 180 жылдығы – оның мұрасын жаңаша ұғынуға, жас ұрпақтың бойына ұлттық рух пен адамгершілік құндылықтарды сіңіруге берілген үлкен мүмкіндік. Бүгінгі таңда Абай еңбектері мектеп бағдарламасынан бастап, жоғары оқу орындарына дейін кеңінен оқытылады. Оның «толық адам» ілімі мен ағартушылық көзқарасы — ұлт болашағын тәрбиелеудегі алтын қазық. Ұлы ақынның мерейтойын атап өту – құрмет қана емес, жауапкершілік. Бұл жыл – Абай тағылымын терең түсінуге, оның рухани әлеміне бойлауға, ойларын өмірде іске асыруға бағытталған игілікті істердің жылы. Ел ішінде Абай атындағы мектептер мен кітапханалар, ғылыми конференциялар, шығармашылық байқаулар мен әдеби кештер ұйымдастырылуда. Бұл — оның мұрасының мәңгілік екенінің айғағы. Абай – тек өткеннің мұрасы емес, болашақтың шамшырағы. Ол — қазақты танудың, өзін түсінудің кілті. Оның 180 жылдық мерейтойы – ұлттың ұлы ұстазының алдында тағзым етіп, оның сөзін санаға сіңірудің тарихи мүмкіндігі.

Төлеубек Нұрасыл,

Абай облысы білім басқармасы, Семей қаласы білім бөлімінің

“Шәкәрім атындағы көпбейінді №5 гимназиясы” КММ, 11 – сынып оқушысы