«Ерекше жан» жобасы басталды

Жалпы ақпарат

– Алматы қаласы Жастар саясаты басқармасының қолдауымен «Сана» зияткер жастар мектебі» қоғамдық қоры жүзеге асырып жатқан бастама.
Жобаның басты мақсаты – ерекше қажеттіліктері бар жастар мен балалардың ата-аналарына қолдау көрсету, олардың әлеуметке бейімделуі мен жеке тұлғалық дамуына жағдай жасау. Біз өткізетін іс-шаралар ерекше жандардың және олардың отбасыларының өмір сапасын арттырып, қоғамда инклюзивті орта қалыптастыруға бағытталған.

⸻

Жобаның мақсаты мен міндеттері:
• Ерекше қажеттіліктері бар балалар мен жастарға жан-жақты қолдау көрсету;
• Олардың қоғамға бейімделуіне және әлеуметке сіңісуіне ықпал ету;
• Ата-аналарға психологиялық көмек көрсету;
• Инклюзивті орта қалыптастыруға жағдай жасау;
• Тең мүмкіндік пен инклюзивті қоғам идеяларын насихаттау.

⸻

Өткізілген іс-шаралар:

Жоба аясында қазіргі таңда 5 психологиялық тренинг және ата-аналарға арналған 4 мотивациялық кездесу ұйымдастырылды. Жалпы 200-ден астам адам қамтылды. Бұл тренингтер ата-аналардың күйзелісі мен созылмалы шаршауын төмендетуге сеп болды. Көп жылдық тәжірибесі бар мамандар ата-аналарға күйзелісті еңсеру мен эмоционалдық қажу жағдайында көмек көрсетті.

Психологиялық және мотивациялық тренингтер – ата-аналар үшін тек сабақ емес, жылулық пен қолдау табатын маңызды алаң. Олар өмірлік тепе-теңдікті табуға, ата-аналық рөлге саналы қарауға және болашаққа сеніммен қарауға көмектеседі.

Ал балаларға арналған шаралар қуаныш пен махаббатқа толы мерекелік көңіл күйді сыйлайды. Мақсат – тек уақытты көңілді өткізу емес, әр баланың ерекше, маңызды әрі сүйікті екенін сезіндіру.

Біз қуанышты фильмдер мен мультфильмдер көрсетеміз, аниматорлар шақырамыз, қозғалысты ойындар мен шеберлік сабақтар өткіземіз. Бұл балалардың қарым-қатынас, өз-өзіне сенім және шығармашылық қабілеттерін дамытуға сеп болады.
Сыйлықтар да ерекше назарда — олар тек ойыншық емес, ұсақ моторика, логикалық ойлау және шығармашылық дамуға арналған арнайы материалдар.

Бірақ біз үшін ең құндысы – балалардың көзіндегі қуаныш пен ата-аналардың алғысы. Бұл іс-шаралар олардың күнделікті өмірін жарқын етіп, қоғамда жалғыз емес екендерін сезіндіреді.

⸻

Негізгі іс-шаралар:
• Тимбилдингтер – жастар арасындағы достық байланыстарды нығайтып, командалық жұмыс дағдыларын дамытуға бағытталған;
• Киновечерлер – эмпатияны дамыту, қарым-қатынас жасау және мәдени тәрбиелеудің құралы ретінде;
• «Менің әлемім» балалар байқауы – өнер арқылы өзін-өзі таныту мен шығармашылықты қолдау;
• Мотивациялық кездесулер – өмірлік шабыт пен қолдауға толы әңгімелер, қиындықтарды еңсерудің нақты мысалдары;
• Аниматорлармен көңілді шаралар – ерекше көңіл күй мен шынайы демалыс атмосферасын жасау үшін;
• IT саласына арналған хакатон – әлеуметтік мәселелерге заманауи шешімдер ұсынуға арналған инновациялық алаң;
• Республика күніне арналған эссе байқауы – шығармашылық ойлау мен жазбаша сауаттылықты дамыту мақсатында.

⸻

Күтілетін нәтижелер:
• Ерекше жастардың әлеуметтік белсенділігі артады;
• Инклюзивті ойлау мен төзімділік мәдениеті қалыптасады;
• Ерекше балалары бар отбасылар үшін қолдаушы қауымдастық пайда болады;
• БАҚ пен әлеуметтік желілер арқылы инклюзия мәселелері мен жетістіктері кеңінен жария етіледі.

⸻

Қорытынды

«Ерекше жан» – ерекше қажеттіліктері бар жастарға арналған жылы жүректі орта мен болашаққа сенімді қадам. Бұл – әр баланың әлеуеті мен бірегейлігін тануға, олардың қоғамның толыққанды мүшесі екенін сезіндіруге бағытталған бастама.