Мемлекеттік тілдің мәртебесі неге төмен?
Тіл – ұлттың ең басты байлығы, рухани қазынасы. Қазақстан Республикасының мемлекеттік тілі – қазақ тілі болғанымен, оның мәртебесі мен қолданыс аясы әлі де толық деңгейге жеткен жоқ.Біз ол мәселені қанша талқыласақ та,көптеген салада орыс тілі кеңінен қолданылып, қазақ тілінің қажеттілігі төмендеп тұр. Бұл мәселенің түп-тамыры тереңде жатыр және оны шешу үшін жан-жақты талдау жасау керек.
Қазақ тілін үйрену мен қолдануға деген қажеттілік барлық салада бірдей емес. Кейбір адамдар қазақ тілін меңгеру маңызды деп санамайды, өйткені жұмысқа орналасу немесе мемлекеттік қызметтерді алу барысында орыс тілі жетіп жатыр. Бұл жағдай қазақ тілінің қоғамдағы рөлін әлсіретуде.
Бәлкім бұл мәселенің таралуы Кеңес Одағы кезінде қазақ тілі екінші мәртебелі тілге айналғаны шығар.Орыс тілі барлық мемлекеттік мекемелерде қызмет етіп,білім беру жүйесінде үстемдік етті.Тіпті тәуелсіздік алғаннан кейін де,бұл үрдіс өзгермеді.Себебі бірнеше ұрпақ орыс тілінде тәлім-тәрбие алды.
Ауылдық жерлерде қазақ тілі негізгі қарым-қатынас тілі болса, қалаларда, әсіресе ірі мегаполистерде, орыс тілі басым болып келеді.Бұл қазақ тілінің толыққанды мемлекеттік тіл ретінде қызмет етуіне кедергі келтіріп отыр.
Мемлекеттік тілдің мәртебесін көтеру – әрбір қазақстандықтың міндеті. Егер мәңгілік ел боламыз десек, өз ана тілімізді бірінші орынға қойып, ал қалған тілдерді елімізді дамыту жолында, өзге де жоғары дамыған елдермен тәжірибе алмасу мақсатында үйреніп, өз елімізде пайдамызға жаратуға тиіспіз.
Кайратова Аружан Канаткызы
11 «В» сынып оқушысы
207 мектеп-лицей
